Strákagöng.
Strákagöng eru næstelstu jarðgöng í íslenska vegakerfinu. Þau voru gerð í gegnum fjallið Stráka nyrst á Tröllaskaga
og voru lengi vel eini akvegurinn til Siglufjarðar sem var fær allt árið. Þau voru opnuð 10. nóvember árið 1967 og eru 793 metrar að lengd.
Þau eru 4,5 metrar á breidd og 5,5 metrar á hæð. Í þeim eru fjögur útskot þar sem bílar geta mæst.
Þegar göngin voru opnuð voru þau lengstu vegagöng á Íslandi og rufu þau áralanga einangrun Siglufjarðar á landi og var hann þar
með kominn í varanlegt vegasamband við þjóðvegakerfi landsins. Mikill hátíðarbragur var í bænum í tilefni dagsins, fánar
blöktu við hún, frí var gefið í skólum bæjarins og verslunum og skrifstofum var lokað meðan opnunarathöfnin fór fram.
