Slæm útreið á æðarvarpi

Þegar snjó tók að leysa eftir tveggja vikna hrakviðri, bleytulenju og snjókomu, hefur komið í ljós að æðarvarp hefur orðið illa úti. Á að giska 60% af hreiðrum í firðinum hafa verið yfirgefin og máfar hafa komist í mikla eggjaveislu.

Ætla má að fjöldi hreiðranna geti verið um 600 og hvert með 4 eggjum að meðaltali. Þá er ljóst að varp annarra fuglategunda s.s. vaðfugla hefur misfarist. Þeir fuglar sem skammt voru komnir í ásetu munu líklegast vera færir um að verpa aftur.

Nokkrir áhugamenn um fuglavarp hafa gripið til byssu og skotið máfa til að hindra það að þeir útrými öllu varpi – en reynslan hefur sýnt að hafi þeir einu sinni komist á bragðið þá eru þeir nær óstöðvandi og hrekja eggjamæður grimmt af hreiðrum sínum.

Myndirnar sýna nýfæddan unga ásamt ábrotnum systkinaeggjum og einum upphengdum óvini.