Franska kvikmyndahátíðin

Kvikmyndasýningar í tengslum við frönsku kvikmyndahátíðina voru á Siglufirði og Ólafsfirði um síðustu helgi. Sýndar voru myndirnar Starbuck og La Princesse de Montpensier (Prinsessan af Montpensier) í Bláa húsinu á Rauðku Torgi og Les triplettes de Belleville (Þríburarnir frá Belleville) í Tjarnarborg á Ólafsfirði.

 

Ég fór og sá myndina Starbuck ásamt fjölda annarra sem sóttu sýninguna og ég get hiklaust mælt með þeirri mynd. Frakkarnir kunna að gera bíómyndir og sérstaklega finnst mér húmorinn hjá þeim góður. Ég skemmti mér allavega stórvel og mér sýndist allir aðrir gera það líka.

 

Söguþráður myndarinnar "Starbuck" : David er 42ja ára en hegðar sér ennþá eins og óábyrgur unglingur. Hann siglir í gegnum lífið með minnstu mögulegu áreynslu og er í flóknu sambandi við Valerie, unga lögreglukonu. Á sama tíma og hún tilkynnir að barn sé á leiðinni, kemur fortíð hans upp á yfirborðið. Tuttugu árum áður stundaði hann þá iðju að selja sæði sitt til sæðisbanka. Hann uppgötvar að sökum þessa á hann nú 533 börn og þar af hafa 142 þeirra höfðað mál saman til að komast að því hver líffræðilegur faðir þeirra er, en þau þekkja hann eingöngu undir nafninu Starbuck.

Í tilefni þess að franska kvikmyndahátíðin teygði sig til Fjallabyggðar bauð veitingahúsið Hannes Boy upp á franska matargerð á laugardagskvöldinu sem var vel sótt og gestir hæstánægðir með.