Magnús Eiríksson í Vasagönguna í 18 sinn i dag

Fréttir

Magnús Eiríksson í Vasagönguna í 18 sinn i dag

Ég heyrði af því að Magnús Eiríksson ætlaði að skella sér í Vasagönguna í 18
skiptið.

Vasagangan er haldin í Svíþjóð og er gangan 90 kílómetra ganga. Pælið þið í
því, 90 kílómetrar. Þannig að Magnús hefur gengið heila 1620 kílómetra bara í
Vasagöngu keppnunum eftir þessa keppni. Ég persónulega verð uppgefinn á því að ganga 9 metrana
út í bíl.

Vasagangan hefst í dag, sunnudaginn 2. mars og hefst kl 08:00 að staðartíma. Gangan er sem fyrr segir 90 kílómetra ganga og er gengið frá Salen til Mora og er áætlaður göngutím Magnúsar eitthvað í kring um 6 klukkutímar. 31 Íslendingar skráðir.

Magnús Eiríksson er einn af duglegri mönnum og ósjaldan mætir maður honum í
göngunum, á leið út á strönd eða inn á Ketilás á hjólagönguskíðunum.

En ég hafði samband við Magnús Eiríksson eða Magga Eiríks eins og
Siglfirðingar kalla hann og bað hann að segja okkur frá því hvernig þetta
byrjaði allt saman og hvernig þetta gangi fyrir sig.

Hér fyrir neðan kemur svar Magga.

Þetta byrjaði árið 1997 þegar ég fór mína fyrstu göngu. Nokkrir félagar mínir í skíðaíþróttinni voru byrjaðir að fara í þessa göngu 2 til 3 árum áður. Það vakti áhuga minn á því að takast á við nýja áskorun og þegar einhver þeirra impraði á því við mig hvort ég vildi ekki prófa þetta var ég ekki lengi að ákveða mig og það varð byrjunin á þessu ævintýri. Síðan hef ég gengið 17 göngur í röð“ sem er náttúrulega bara bilun“.

Þessi hópur samanstóð af gömlum köppum, Kristjáni Rafni Guðmundssyni frá Ísafirði, Stefáni Jónassyni frá Akureyri og Jóhannesi Kárasyni frá Akureyri. Jóhannes og Kristján eru enn í þessum hóp en Stefán er hættur fyrir nokkrum árum. Síðar komu synir Jóhannesar inn í þetta og fleiri kappar m.a. Njáll Eiðsson sem er kunnur knattspyrnukappi og þjálfari. Sjálfsagt muna margir Siglfirðingar eftir honum þegar hann kom hér ungur og lék knattspyrnu með KS um miðjan áttunda áratuginn,

Þá er konan mín búin að fara 4 göngur með mér og Ingólfur sonur minn er að fara núna í annað skiptið með mér.

Í gegnum árin hafa margir skíðamenn komið og farið í þessum hóp.

Nú í ár er með okkur í för gamall Siglfirskur skíðakappi Þórhallur Sveinsson það er mjög gaman að fá að vera með þessu gömlu íslandsmeisturum Þórhalli og Kristjáni sem maður leit upp til þegar maður var að stíga sín fyrstu spor í þessari íþrótt.

Undirbúningurinn fyrir þessa göngu í ár hefur ekki verið eins mikill og oft áður hjá mér af ýmsum ástæðum en þó vonandi nægur til þess að manni takist að ljúka göngunni.Þessi 90 km ganga krefst þess að menn séu í sæmilega góðu formi þannig að það þíðir ekkert að koma illa undirbúinn til leiks.

Myndirnar sem fylgja umfjöllun sendi Magnús okkur.