Spurningakeppni átthagafélaganna 2014

Fimmtudaginn 13. mars verður fimmti og síðasti riðill í spurningakeppni átthagafélaganna í Breiðfirðingabúð í Reykjavík. Þar keppir lið Siglfirðingafélagsins annars vegar við lið Árnesingafélagsins og hins vegar við lið Dýrfirðingafélagsins.

Í liði Siglfirðingafélagsins eru Ásdís Jóna Sigurjónsdóttir, Skúli Þór Jónasson og Ragnar Jónasson. Þeim til halds og trausts er Jónas Ragnarsson. Ásdís Jóna er dóttir Sigurjóns Erlendssonar rafvirkja og starfar hjá Pennanum, Ragnar er lögfræðingur og rithöfundur, sonur Jónasar liðsstjóra, og Skúli Þór er nemi í heilbrigðisverkfræði og sonur Jónasar Skúlasonar sem er í stjórn Siglfirðingafélagsins. Ragnar og Skúli Þór náðu mjög langt í Gettu betur á sínum tíma.

Rakel Björnsdóttir formaður Siglfirðingafélagsins leggur áherslu á að Siglfirðingar fjölmenni í Breiðfirðingabúð og hvetji sitt fólk.

Þetta er í annað sinn sem Siglfirðingafélagið tekur þátt í spurningakeppni átthagafélaganna. Liðið í fyrra var skipað Ásdísi Jónu, Birki Jóni Jónssyni og Ragnari. Þau stóðu sig vel en komust ekki í úrslit.