Frábær gönguferð í gærkvöldi

Í gærkvöldi skelltum við okkur hjónakornin í frábæra gönguferð með Ferðafélagi Siglufjarðar ásamt stórum og góðum hópi af hressu fólki, en rúmlega 40 manns voru í hópnum.  Lagt var af stað uppúr kl. 9 á rútum frá Torginu, keyrt inn í Mánárdal og lagt af stað eftir hinni svokölluðu Dalaleið, sem maður hefur nú gengið nokkrum sinnum.Veðrið var alveg magnað; logn, sólskin og hiti enda hitnaði mörgum fljótt á göngunni.  Þegar komið var upp úr Mánárdalnum var stefnan tekin á Hvanneyrarskálina og síðan gengið á brúnunum fyrir botn hennar áður en haldið var niður á leið.  Ferðin endaði síðan á pallinum hjá fararstjóranum Gesti Hanssyni og Huldu þar sem okkar beið dýrindis kjötsúpa.  Þar var spjallað og hlegið í dágóðan tíma og ekki komið heim fyrir en um 4 í nótt.  Gangan sjálf tók um 4 og hálfan tíma enda farið hægt yfir eins og lagt var upp með.  Þetta er fyrsta alvöru fjallaferðin okkar hjónanna saman en nú hefur verið ákveðið að gera meira af þessu, enda frábært fyrir líkama og sál.  Stofnað hefur verið nýtt myndaalbúm með nokkrum myndum úr ferðinni og þar verða settar inn myndir úr tilvonandi ferðum og þeim sem ég hef farið áður.  Albúmið fékk að sjálfsögðu nafn eftir einu lagi Bítlanna og þá var nærtækast að nefna það The Fool on the Hill.