Ótrúlegt ástand

Fréttir

Ótrúlegt ástand

Björn Valur Gíslason

Stjórnmálin á Íslandi er farin að taka á sig undarlegustu myndir. Það keyrði þó algjörlega um þverbak í vikunni þegar Davíð Oddsson hótaði því hreinlega að ef hann fengi ekki að vera í friði í sínum Seðlabanka þá færi hann aftur í stjórnmálin, sem hann hefur reyndar aldrei farið frá. Forsætisráðherrann lætur þetta yfir sig ganga möglunarlaust, utanríkisráðherra sömuleiðis og hvorugur man eftir nú eftir nokkrum samtölum við seðlabankstjórann sem segist hafa reynt að leggja þeim lífsreglurnar fyrr á árinu varðandi yfirvofandi efnahagshrun á landinu. Þessi uppákoma er svo ótrúleg og svo vitlaus í allri sinni mynd að tekur ekki nokkru tali. Á meðan þúsundir Íslendinga er að missa vinnuna, þúsundir heimila komin á vonarvöl og hundruð fyrirtækja á leið í gjaldþrot, þá láta æðstu ráðamenn landsins eins og fífl á opinberum vettvangi. Í hvert sinn sem formenn stjórnarflokkanna að ekki sé nú talað um seðlabankastjórann, tjá sig opinberlega fellur Ísland í áliti erlendis, traustið fjarar út og við erum sett á sama bás og fjarlæg lönd sem við höfum aldrei viljað kenna okkur við. Það er engu nær en að þetta aumingjans fólk sé orðið algjörlega veruleika firrt, geri sér enga grein fyrir ástandinu hjá íbúum landsins og geti ekki með nokkru móti hagað sér eins og stjórnendur eiga að gera á erfiðum tímum. Að ekki sé talað um að nokkurt þeirra hafi manndóm í sér til að axla ábyrgð á ástandinu og öllum þeim ósköpum sem leidd hafa verið yfir land og þjóð að undanförnu. Það er þjóðinni mikil ógæfa að hafa slíkan hóp fólks við stjórnvölin.

Til baka

Ótrúlegt ástand