Tækifærið er núna

Fréttir

Tækifærið er núna

Björn Valur Gíslason

Væntanleg ríkisstjórn Vinstri grænna og Samfylkingar mun án vafa taka lög um stjórn fiskveiða til endurskoðunar á kjörtímabilinu. Markmiðið með því verður eftir sem áður að venda fiskistofna, efla atvinnu og byggð í landinu og ná sátt meðal þjóðarinnar um nýtingu auðlinda sjávar. Um þetta hef ég margsinnis fjallað í ræðu og riti á undanförnum árum. Ég hef jafnramt varað við því að inngrip í stjórnkerfi fiskveiða verði til þess að valda einhverskonar kollsteypu eða upplausn í greininni eða samfélaginu almennt. Ég vill að stjórnmálamenn, sjómenn, útgerðarmenn og aðrir aðila í greininni setjist niður í þeim tilgangi að átta sig á þeim veilum sem greinilega eru víða í stjórnkerfi sjávarútvegsins. Ég myndi vilja að sett yrði upp einhverskonar módel eða reiknilíkan þar sem hægt væri að gera sér nokkuð auðveldlega grein fyrir áhrifum hinna ýmsu breytinga á stjórnkerfinu áður en til þeirra verður gripið. Þetta á jafnt við um útgerðina, fiskvinnsluna, og samfélagið allt, enda er allt samfélagið í raun undir þegar að sjávarútveginum kemur. Það ætti auðveldlega að vera hægt að gera. Umræða um sjávarútveg hefur alla tíð verið mjög harkaleg en að sama skapi skilað afar litlum árangri. Því verður að linna. Nú er komið að því að við setjumst niður og ræðum málið af yfirvegun og skynsemi og leitum lausna á þeim ágreiningsmálum sem uppi eru í samfélaginu vegna sjávarútvegsins. Tækifærið er núna.