Þjóðlagahátíðin á Siglufirði 1.-5. júlí 2009

Þjóðlagahátíðin á Siglufirði er nú haldin í 10. sinn. Hátíðin er helguð íslenskri tónlist og listamönnum og má með sanni segja að hún sé með "sykri og rjóma" að íslenskum auðmanna sið. Margir af okkar bestu og fræknustu tónlistarmönnum flykkjast í fjörðin fagra fyrstu viku júlí -frá klassískum tónlistarmönnum og poppurum, eins og Bryndísi Höllu, Steinunni Birnu, Berþóri Pálssyni, Guðna Franzsyni, Tómasi R. Einarssyni og Melchior, til þjóðlagasöngvara og kvæðamanna sem syngja, spila og kveða írska, norska, ítalska og íslenska þjóðlagatónlist okkur til ánægju og yndisauka. Svo koma víst líka einhverjir "Ljótir hálfvitar" og sá orðrómur hefur hvissast út að galdrar verði framdir af Steindóri Andersen og Páli á Húsafelli með fulltingi Sigur rósar.

Að vanda verður boðið upp á mörg námskeið, s.s í búlgörskum dönsum, keðju- og skartgripagerð og glímu, og haldnir verða fyrirlestrar um kúbanskan tónlistararf og sögu trúbadorsins. Þjóðlagaakademían verur einnig á sínum stað þar sem áhugamenn um íslenska þjóðdansa og tónlist geta fræðst um okkar sérstaka þjóðararf.

Allar upplýsingar um dagskrá Þjóðlagaháðar 2009 má finna á www.folkmusik.is.