Blóðugir glæpir á Siglufirði

Siglfirska spennusagan Snjóblinda kemur út þriðjudaginn 19. október og verður útgáfunni fagnað í bókaverslun Eymundsson við Skólavörðustíg í Reykjavík kl. 17 þann dag.

Þar mun höfundurinn, Ragnar Jónasson, lesa upp úr bókinni og árita eintök. Stefnt er að útgáfukynningu á Siglufirði síðar í sömu viku og verður það nánar auglýst síðar.



Bókin sem kemur út hjá Bókaforlaginu Veröld hefur hlotið titilinn Snjóblinda, en sagan gerist að vetrarlagi á Siglufirði og er líklega fyrsta sakamálasagan þar sem bærinn er notaður sem sögusvið.

Í tilkynningu frá Veröld kemur fram að sagan gerist að stærstum hluta að vetri til í þessum fagra kaupstað við nyrsta haf sem getur orðið býsna ógnvekjandi fyrir aðkomumann þegar snjónum kyngir niður, ófærð stöðvar allt - og myrkrið hvolfist yfir.

Þetta er önnur sakamálasaga Ragnars, en sú fyrsta, „Fölsk nóta”, kom út hjá Veröld í fyrra og hlaut góðar viðtökur og var um tíma í efsta sæti metsölulista Eymundsson.

Það bíða því margir spenntir eftir útkomu bókarinnar og gaman verður fyrir Siglfirðinga að lesa sakamálasögu þar sem sögusviðið er kunnuglegt.