Skíðasvæðið í Skarðsdal opnar á morgun
Seint í gærkvöldi sá fréttamaður Sigló.is skarðsprinsinn sjálfan læðast með snjótroðarann uppí Skarð. Yndislegar fréttir hugsaði hann með sér, eitt símtal og Egill staðfesti áformin. Skíðasvæðið í Skarðsdal opnar á morgun, laugadaginn 6.nóvember, fyrst allra skíðasvæða á landinu og það verður meira að segja FRÍTT í lyfturnar þennan dag.
Gleðitíðindi fyrir skíðaunnendur á Siglufiðri og í nágrenni.
Fréttamaður laumaði sér uppí fjall í gær og smellti þessari mynd af skíðaskálanum en það má draga þá ályktun að starfsmenn Valló eigi nokkur skóflutökin eftir áður en þeir byrja að moka út pylsum og gosi úr skíðaskálanum. Engu að síður verður boðið uppá veitingar strax á morgun en einungis er þó stefnt að því að opna neðstu brekkuna.
Þær framkvæmdir sem ráðist var í á liðnu sumri við að slétta brekkurnar hafa skilað sér strax og er skíðasvæðið nú að opna mun fyrr en það gerði á síðasta ári. Hellingur er af snjó í fjallinu og brautin alveg þakin hvíta gullinu, en þó glittir enn í auða bletti utan brautar.
Nú er stutt fyrir Eyfirðinga að skella sér yfir og kanna aðstæður á Sigló.
Athugasemdir