Siglfirsk spennusaga á toppnum

Siglfirska spennusagan Snjóblinda var mest selda íslenska skáldsagan vikuna 18.- 24. október, samkvæmt metsölulista Félags íslenskra bókaútgefenda, sem nær til verslana um allt land.

Á lista yfir allar seldar bækur er Snjóblinda í sjötta sæti, aðeins þýddar sögur og handbækur eru ofar.


Þess er skemmst að minnast að Ragnar Jónasson, höfundur Snjóblindu, las úr bók sinni á Siglufirði á föstudaginn, á vettvangi glæpsins.

Í kjölfarið áritaði hann eintök af bókinni í "kaupfélaginu" í eina og hálfa klukkustund.

Bækurnar runnu út eins og heitar lummur og greinilegt að siglfirðingar eru spenntir fyrir þessari nýju bók Ragnars.

Siglfirðingar eru þó greinilega ekki einir um áhugann því bókin fer beina leið á topp metsölulistans.