Dýrbítur laus í firðinum ?

Í gærkveldi, er ljósmyndarinn var á ferð frammi á firði, vakti forvitni hans fólksfjöldi uppi í fjallinu sunnan við Stórabola. Myndavélinni var brugðið upp og kom þá í ljós þessi myndflötur þar sem meðal annars mátti sjá dauða rollu í skurðinum þar sem flest fólkið var.

Aðrir voru víða uppi í fjallinu sunnar og virtust vera að huga að einhverju. Við nánari athugun kom í ljós að hundur hafði bitið rollu á háls svo mikið blæddi, lömbin sem verið var að leita af hurfu af vettvangi.

Lögreglan var til kvödd sem og aflífaði rolluna þar sem ekki þótti mögulegt að bjarga henni, þrátt fyrir að þeir sem þarna komu að höfðu bundið um sárið.

Skrokkurinn var síðan settur í bíl og dysjaður annarsstaðar.

Ekki er með vissu vitað um eigendur rollunnar né hundsins, en giskað var á að rollan hefði átt ættir að rekja úr Fljótunum.