Ólafur G. Einarsson er heiðursborgari Garðabæjar

Ólafur G. Einarsson er heiðursborgari Garðabæjar. Á hátíðarfundi 
bæjarstjórnar sem haldinn var 7. janúar, var einróma samþykkt 
að gera Ólaf að heiðursborgara Garðabæjar. Ólafur er annar 
heiðursborgari bæjarins en séra Bragi Friðriksson hlaut þá nafnbót 
fyrstur manna árið 2001.


Erling Ásgeirsson, formaður bæjarráðs bar á fundinum fram 
svohljóðandi tillögu um að Ólafur yrði heiðursborgari Garðabæjar, 
fyrir hönd allra bæjarfulltrúa.

Tillagan um að gera Ólaf G. Einarsson að heiðursborgara Garðabæjar var samþykkt með atkvæðum allra bæjarfulltrúa.
Frá vinstri: Erling Ásgeirsson, Stefán Snær Konráðsson, Ragnhildur Inga Guðbjartsdóttir, Sigrún Aspelund, Hjördís Eva Þórðardóttir, Steinþór Einarsson, Páll Hilmarsson og Gunnar Einarsson bæjarstjóri.



"Bæjarstjórn Garðabæjar samþykkir að gera Ólaf G. Einarsson að 
heiðursborgara Garðabæjar. Með því vill bæjarstjórn sýna Ólafi 
þakklæti fyrir störf hans í þágu bæjarins og bæjarbúa og undirstrika 
að verk hans í Garðabæ verða í minnum höfð.“

Í greinargerð sem fylgdi tillögunni kemur fram að á þessu ári eru 50 
ár síðan Ólafur G. Einarsson var ráðinn sveitastjóri í Garðahreppi. 
Þar segir jafnframt: "Ólafur hafði mótandi áhrif á uppbyggingu 
bæjarsamfélagsins í Garðabæ og var frumkvöðull á mörgum sviðum. 
Hugmyndir Ólafs á sviði skipulagsmála voru að mörgu leyti verið 
ólíkar því sem þá gerðist í bæjum á Íslandi og einkenndust m.a. af 
áherslu á lágreista byggð og stórar lóðir. Með hugmyndum Ólafs var 
lagður grunnur að þeirri skipulagsstefnu sem síðan hefur í 
meginatriðum ráðið ríkjum í Garðahreppi og síðar Garðabæ. Sú stefna 
hefur frá upphafi gert Garðabæ að eftirsóknarverðum stað til að búa á."

Ólafur fæddist á Siglufirði 7. júlí 1932. Hann lauk lögfræðiprófi frá 
Háskóla Íslands vorið 1960. Þá um sumarið hóf hann störf sem 
sveitarstjóri í Garðahreppi og gegndi því til ársins 1972. Hann var 
kjörinn í hreppsnefnd Garðahrepps árið 1966 og átti sæti í nefndinni 
og síðar í bæjarstjórn til ársins 1978. Hann var oddviti 
hreppsnefndar á árunum 1972–1975 og forseti bæjarstjórnar 1976–1978. 
Ólafur var kjörinn á Alþingi árið 1971 og átti þar sæti til ársins 
1999 er hann gaf ekki kost á sér til endurkjörs. Hann var 
menntamálaráðherra á árunum 1991–1995 og forseti Alþingis 1995–1999.

Til fundarins var boðið öllum þeim sem hafa setið í bæjarstjórn Garðabæjar og stilltu þeir sér upp til myndatöku.



Ólafur G. Einarsson hefur verið búsettur í Garðabæ frá árinu 1961. 
Kona hans er Ragna Bjarnadóttir og eiga þau eina dóttur.

Páll Hilmarsson, forseti bæjarstjórnar gerði frekari grein fyrir 
starfsferli Ólafs á fundinum.

Ræða Páls HÉR

Fundargerð bæjarstjórnar HÉR