Guðrún Ósk Gestsdóttir í úrvalshóp FRÍ

Enn berast okkur fréttir af ungu afreksfólki héðan úr bæ og nú eru það frjálsar íþróttir.

Guðrún Ósk Gestsdóttir er ein af 10 stúlkum á hennar aldri á landinu sem náð hefur lágmörkum til að komast í úrvalshóp Frjálsíþróttasambands Íslands á þessu ári.  Það voru árangrar Guðrúnar í langstökki og grindahlaupi sl. vor sem komu henni í þennan hóp.
Guðrún átti við meiðsl að stríða í sumar og gat því ekki æft sem skyldi en er búin að ná sér og er í æfingabúðum á Akureyri nú um helgina með úrvalshópnum þar sem efnilegustu frjálsíþróttamenn landsins æfa saman undir handleiðslu okkar færustu þjálfara.

Guðrún stefnir að þátttöku í nokkrum mótum á næstu vikum á Akureyri og í Reykjavík og verður spennandi að sjá hvernig þessari efnilegu frjálsíþróttakonu vegnar þar.



Það er deginum ljósara að íþróttafélögin hér í bæ eru að gera mjög góða hluti og þjálfarar þeirra að vinna frábæra vinnu. Alls ekki má slaka á neinu varðandi uppbyggingu og aðstöðu íþróttafólks, íþróttir eru besta forvörnin sagði fyrrum formaður ÍBS og er rétt að ítreka þessi orð.