Mjög góður árangur Umf. Glóa á Stórmóti ÍR

Um síðustu helgi tóku 11 keppendur frá Glóa þátt í hinu árlega Stórmóti ÍR í frjálsum íþróttum í Reykjavík.  Mótið stóð sannarlega undir nafni því það reyndist fjölmennasta frjálsíþróttamót sem haldið hefur verið innanhúss á Íslandi með 760 skráða keppendur.  Keppendur í hverri grein voru 30-60 talsins í helstu aldursflokkum en samt sem áður náðu keppendur Glóa 12 sinnum að verða meðal þeirra 10 fremstu í þeim tæplega 40 greinum sem þau kepptu í.



Tvenn silfurverðlaun komu í hlut Siglfirðinga, Elín Helga Þórarinsdóttir varð í 2. sæti í kúluvarpi hjá stúlkum 9-10 ára og Björgvin Daði Sigurbergsson náði í silfrið í 60 metra grindahlaupi hjá 11 ára strákum.  Björgvin stóð sig sérstaklega vel á þessu móti því hann varð einnig í 4. sæti í þremur öðrum greinum.



Aðrir keppendur stóðu sig með prýði og má t.d. nefna að Salka Heimisdóttir varð í 6. sæti í hástökki 12 ára stúlkna, Sigríður Ása Guðmarsdóttir í 7. sæti í langstökki 9-10 ára stúlkna, félagarnir Guðbrandur Elí Skarphéðinsson og Guðmundur Árni Andrésson höfnuðu báðir í 9. sæti á sínu fyrsta alvöru frjálsíþróttamóti, Guðbrandur í kúluvarpi og Guðmundur í 600 metra hlaupi og svona mætti áfram telja.



Frábær árangur hjá þessum efnilegu krökkum og frjálsíþróttastarfið hér við ysta haf heldur áfram að vekja athygli þeirra sem fylgjast með þessari íþróttagrein.  Nánari fréttir má nálgast á heimasíðu Glóa www.123.is/umfgloi