Atvinnumálin í forgang

Fréttir

Atvinnumálin í forgang

Birkir Jón Jónsson

Tækifærin til þess að fjölga störfum og efla íslenskt atvinnulíf eru fjölmörg á Íslandi í dag. Hins vegar gerast hlutirnir ekki að sjálfu sér – það verður að ráðast í markvissar aðgerðir til þess að svo verði. Í raun er svo mikilvægt að í slíkt átak verði ráðist ella eigum við það á hættu að efnahagslægðin verði enn dýpri en hún er með tilheyrandi breytingum á því velferðarsamfélagi sem við viljum byggja.

Eftir öfluga málefnavinnu innan Framsóknarflokksins um íslenskt atvinnulíf, sem var samþykkt var á síðasta flokksþingi, er ljóst að tækifærin eru fjölmörg. Í þeirri vinnu var haft víðtækt samráð og viðtöl við aðila innan atvinnulífsins. Á grundvelli þessarar vinnu verður lögð fram þingsályktunartillaga á Alþingi í næstu viku um markvissar aðgerðir til þess að fjölga störfum í íslensku samfélagi. Vonandi verður þessum hugmyndum Framsóknar tekið með opnum huga og jákvæðni af hálfu stjórnvalda. Reynslan hefur því miður verið önnur t.d. um leiðréttingu á lánum heimila og fyrirtækja, fjölmörgum tillögum í efnahagsmálum eða í Icesave málinu.

Á næstu vikum munu þingmenn Framsóknarflokksins mæla fyrir tillögum í atvinnumálum. 15.000 Íslendingar eru án atvinnu, þúsundir hafa flutt af landi brott og kaupmáttur almennings hefur lækkað. Þessari þróun verður að snúa við.

Til baka