Dáni Kálfur

Við sem stunduðum sjóinn frá Siglufirði fyrrihluta níunda áratugarins munum eftir Hálfdáni Guðröðarsyni. Dáni var á skipum frá Siglufirði um nokkura ára bil. Stálvík, Siglfirðingur og Sveinborg voru skip sem Dáni stundaði sjóinn á.Dáni er frá Kálfavík í Skötufirði í Ísafjarðardjúpi en er nú búsettur í Bolungarvík.
Ekki fékk hann viðurnefnið “Kálfur” vegna þess að hann sé svo illa gefinn. Kálfs nafnið er tenging við bæinn sem að hann kemur frá.  Bær sem að var einangraður langtímum saman.  Þar lærði náttúru barnið Hálfdán að lifa á því sem að sjórinn gaf af sér. Fiskur og selkjöt voru því algengar máltíðir i Kálfavík.
Í stuttri heimsókn til Bolungarvíkur var litið við hjá Dána.
Mér leið vel á Siglufirði. Fólkið þar er svo líkt fólkinu hér fyrir vestan.  Gestrisið
og vinsamlegt.  Ég kynntist mörgum góðum drengjum þegar ég stundaði þar sjóinn.   Hörku mönnum sem að gott var að vera með.  Mér þótti það mjög leitt þegar ég frétti af fráfalli Þorra Birgis vinar míns.  Mér leið alltaf vel í návist hans.
Ég drakk mikið brennivín á þessum árum. Nú er það liðin tíð.  Ég vil ekki lengur eyða orku og peningum í slíka hluti.  Hér áður fyrr tolldi ég illa í sambúð. Einn vinur minn spurði mig eitt sinn hvað ég hefði búið með mörgum konum.  Ég svaraði því til að ég nennti ekki að taka það saman en sú síðasta hefði farið frá mér á 17. sel. Þetta var nú meira sett fram í gamni.  Ég hef síðustu fjórtán árin verið í sambúð með yndislegri Tælenskri konu sem að hefur kennt mér  margt. Umhyggja, dugnaður og útsjónarsemi er henni í blóð borið.  Ég kenndi henni fljótlega að beita línu. Nú er hún eftirsóttur starfskraftur hér fyrir vestan til þeirra starfa.



Undanfarin ár höfum við verið að leggja til hliðar og byggja hús í Tælandi.  Með því móti höfum við getað búið til störf fyrir ættingja hennar.  Fjölskylduböndin eru sterk hjá Tælendingunum. Þeir hugsa ekki bara um sjálfan sig.
Þegar húsið er að fullu risið þá á ég von á að við dveljum þar yfir vetrarmánuðina. Frá vori til haust vil ég fá að vera hér fyrir vestan. Ég er orðinn 62 ára gamall og skrokkurinn farinn að gefa sig.  Vonandi hjálpar það eitthvað uppá heilsuna að fá að vera í velgjunni í Tælandi yfir veturinn.
Konan mín er afbragðs kokkur. Hún eldar hér Tælenskan mat fyrir fólk á tillidögum. Við komum á Síldarhátíð á Sigló fyrir nokkrum árum og elduðum ofaní hátíðargesti.
Er ekki kominn tími til að við endurtökum leikinn sagði þessi lífsreynda kempa þegar við kvöddumst í dyragættinni á litla húsinu í Bolungarvík.

Róbert Guðfinnsson