Frábær Þjóðlagahátíð

Þrátt fyrir vonskuveður í byrjun Þjóðlagahátíðar var aðsókn á hátíðina mjög góð. Á fjórða þúsund sóttu tónleika, námskeið og fyrirlestra og eftir góðviðri síðustu dagana virtust allir gestir okkar fara sælir heim.


„Þótt það rigndi eldi og brennisteini tvo fyrstu dagana þá getum við talað um næst fjölmennustu hátíðina. Greinilegt var að þeir sem hugðust á annað borð koma norður á Siglufjörð létu veðrið ekki slá sig út af laginu.“ sagði Gunnsteinn Ólafsson listrænn stjórnandi hátíðarinnar. Hann sagði ennfremur að hátt í hundrað manns, bæði ungir og aldnir, sóttu námskeið í tónlist, fornu handverki eða útieldamennsku og rúmlega þrjú þúsund manns sóttu leiksýningu og tónleika hátíðarinnar. Endurtaka varð tónleika hljómsveitarinnar Hjaltalín og uppselt var á tónleika Nesa, Sjönu og hinna kellinganna í Bátahúsinu. „Við héldum að veðrið myndi gera okkur erfitt fyrir en það var öðru nær. Aðsókn að tónleikum hefur verið gríðarleg og námskeiðin vel sótt.“
Stóð eitthvað upp úr að hans mati? „Það er erfitt að gera upp á milli en mér fannst tónleikar Spilmanna Ríkínís vera mjög góðir og Eddie Walker frá Englandi var afbragðs góður með gítarinn og trompetinn sem hann faldi í munni sér“, segir Gunnsteinn kankvís að venju. „Þetta var skemmtileg hátíð og ég þakka Siglfirðingum enn og aftur fyrir að fóstra hana. Vinsemd og velvilji allra sem koma að hátíðinni er einstök. Það eru allir boðnir og búnir að greiða götu hennar og fyrir það vil ég þakka.“

Á næsta ári verða liðin 150 ár frá fæðingu sr. Bjarna Þorsteinssonar þjóðagasafnara og tónskálds. Þá er ætlunin að hafa þjóðlagahátíðina mjög veglega og jafnframt stendur til að gefa út nýja ævisögu sr. Bjarna Þorsteinssonar. Unnendur hátíðarinnar geta því strax farið að hlakka til.
Hátíðin verður dagana 6.-10. júlí 2011.