Magnaðir tónleikar með Hymnodiu. Myndir og myndband

Ég var bókstaflega dreginn á tónleika miðvikudaginn 6. nóv. Þar var söng og skemmtihópurinn Hymnodia á ferð og tónleikarnir fóru fram í Siglufjarðarkirkju.

 

Ég verð að segja alveg eins og er að ég var nú ekkert sérstaklega spenntur yfir því að vera dregin á einhverja klassíska (eins og ég hélt) tónleika með frúnni, eldri dótturinni og tengdamömmu. Ég er reyndar alæta á tónlist og get líklega hlustað á flest allt, en þó ekki alveg allt.

 

Fimlega reyndi ég að koma mér hjá því að fara á tónleikana og hljómaði líklega eins og þreytt eiginkona í sambúð með ofvirkum eiginmanni sem langar til að gera eitthvað allt annað en að fara að sofa . "Ég held bara að ég sé með hausverk ég er líka eitthvað svo slæmur í bakinu og ég á bara eftir að gera svo margt fyrir morgundaginn". Meira að segja spurði ég " á ég ekki bara að vaska upp fyrir þig Ólöf mín og jafnvel setja í þvottvél eða eitthvað?" Já og " Ég skal bara passa í kvöld svo þú getir farið með mömmu þinni á tónleikana". 

 

En allt kom fyrir ekki. Svona sæmilega gekk mér að skrölta út í bíl og keyra á tónleikana sem voru reyndar einungis í 50 metra göngufæri en það var vegna þess að ég var að eigin sögn, bara aaalveg að drepast í hnénu.

 

 Ég sagði við hugsanlega verðandi frú mína áður en við fórum inn, "ég ætla að vera aftast í kirkjunni ef ég skildi allt í einu fá í magann eða hausverk og þurfa að hlaupa út". Og án gríns þá ætlaði ég að vera í korter og fá svo skelfilega í magann eða dúndrandi hausverk.

 

Þetta byrjaði á því að þau koma inn syngjandi, berjandi á ferðatösku og eitthvað verkfæri sem ég man ekki hvað heitir. Og þá strax voru þau búin að vinna mig á sitt band. Ég hugsaðið með mér að þetta gæti nú alveg verið spennandi.

 

Hausverkurinn og magakveisan var gleymd, hnéð komið í lag og ég vissi ekki hvað það þýddi að "vaska upp" og "setja í þvottavél", ég hafði bara aldrei heyrt þessi orð áður.  Og svo bara batnaði þetta þangað til þetta varð bara alveg frábært.

 

Spjallið við áhorfendur sem flest allir í Hymnodiu tóku þátt í var stórskemmtilegt. Hljóðfærin, dansinn, sögurnar, grínið, léttleikinn, lögin og svo dansinn við einn úr áhorfendahópnum var meiriháttar.

 

Það eina sem ég hafði út á þetta að setja var að Ólöf hefði mátt draga mig á tónleika með þeim miklu fyrr.

 

Takk fyrir meiriháttar skemmtilegt kvöld Hymnodia.

 

 

Og á myndunum og myndbandinu hér fyrir neðan geti þið séð að það var alls engin lognmolla yfir þessu hjá þeim.

 

 

 

 

 

 

 

Og svo ör-myndband af stemmingunni á tónleikum Hymnodiu í Siglufjarðarkirkju 6. nóvember