12 keppendur frá Glóa á Stórmót ÍR

12 keppendur eru skráðir til leiks frá Glóa á Stórmót ÍR í frjálsum sem fer fram um helgina í Laugardalshöllinni í Reykjavík og keppa þeir í alls 46 greinum.  Þetta er fjölmennasti hópurinn sem Glói hefur sent á þetta mót, í fyrra fóru 9 keppendur, 11 árið á undan og fyrsta árið sem mótið fór fram, 2007, átti Glói 4 keppendur.


Keppendur félagsins hafa öll árin komið heim með einhver verðlaun af þessu móti og vonandi verður það sama upp á teningnum í ár.  Mótið verður stærra með hverju árinu og að þessu sinni eru skráðir keppendur um 750.  12 ára og yngri keppa aðeins á laugardeginum frá kl. 9.00 til 14.00 en þeir eldri keppa bæði á laugardegi og sunnudegi.  Hægt er að fylgjast með gengi keppenda á Mótaforriti Frjálsíþróttasambandsins á síðu þess www.fri.is

Auk þess taka þátt í mótinu hinar siglfirsku frjálsíþróttastúlkur Guðrún Ósk Gestsdóttir, sem nú keppir fyrir UMSS, og Svava Stefanía Sævarsdóttir, sem nú æfir og keppir með ÍR í Reykjavík. En þær eru tvímælalaust meðal efnilegustu frjálsíþróttakvenna landsins.