Framsókn í sínu rétta ljósi

Fréttir

Framsókn í sínu rétta ljósi

Björn Valur Gíslason

Framsóknarmenn láta enn eins og nýr flokkur hafi orðið til á landsfundinum á dögunum. Þeir hafa reynt að telja fólki trú um að með því að fá ungan og pólitískt nokkuð óspjallaðan mann í formannssætið hafi orðið algjör umskipti í flokknum og gamlar syndir og afglöp við landsstjórnina þar með strikaðar úr sakramentinu. Nú er annað að koma í ljós eins og svo marga grunaði. Nýr formaður framsóknarflokksins lét það verða sitt fyrsta verk eftir að ljóst var að ríkisstjórn Geirs Haarde var að hrökklast frá, að bjóðast til að verja minnihlutastjórn Vinstri grænna og Samfylkingar falli. Það boð var sett fram án skilyrða og að því er virtist í þeim tilgangi að koma hér á starfhæfri ríkisstjórn á erfiðum tímum. Það var engu líkara en Framsóknarflokkurinn vildi í einlægni leggja sitt af mörkum við að reisa landið við úr þeim rústum sem flokkurinn ber svo mikla ábyrgð á að hafa komið okkur í. En þetta var of gott til að reynast satt. Framsóknarmenn hafa nú sett fram nokkur ófrávíkjanleg skilyrði varðandi stuðning sinn við nýja ríkisstjórn. Flokkurinn vill hvalveiðar – flokkurinn eggst gegn skattahækkunum – flokkurinn vill kosningar þegar það hentar honum – framsóknarmenn vilja kjósa stjórnlagaþing og nýja stjórnarskrá eftir nokkra mánuði– formaður framsóknar segir nú að nýja ríkisstjórnin sé engin óska stjórnog flokkurinn muni veita henni gott aðhald. Framsóknarflokkurinn er allt í einu farin að setja skilyrði líkt og hann telji að nýja ríkisstjórnin verði lítið annað en starfsstjórn framsóknar. Framsóknarmenn vilja hinsvegar ekki axla ábyrgð, þeir neita að setjast í ríkisstjórn. Þeir vilja stjórna en láta aðra um erfiðu verkin en ætla sér að fá kredit fyrir það sem vel tekst. Ný forysta hefur því sýnt það og sannað að það hefur ekkert breyst í framsóknarflokknum, hann er enn sami valdagráðugi flokkurinn og hingað til og er ekkert heilagt í þeim efnum.
Í viðræðum Vinstri grænn og Samfylkingar hafði þegar verið rætt um að kjósa stjórnlagaþing og endurskoða stjórnarskránna, það vissu framsóknarmenn. Það dettur hinsvegar engum í hug að boðlegt sé að endurskoða stjórnarskrá lýðveldisins á nokkrum vikum eða mánuðum svo vel verði, án eðlilegrar umræðu og skoðanaskipta í þjóðfélaginu. Það er mun viðameira verk en svo og hugmyndir framsóknarmanna um annað því í eðli sínu afar ólýðræðislegar.
Vilji framsóknarmenn hinsvegar fella nýju ríkisstjórnina á hvalveiðum – þá gera þeir það. Vilji framsóknarmenn fella nýja ríkisstjórn vegna andstöðu sinnar við nauðsynlegra tekjuöflun ríkisins – þá gera þeir það. Þá munu þeir væntanlega verða látnir axla ábyrgð á þeim gjörningum í væntanlegum kosningum. Framsóknarflokkurinn hefur enga stöðu til að vera að þenja sig.

Til baka