Furðuleg umfjöllun um stjórn fiskveiða

Fréttir

Furðuleg umfjöllun um stjórn fiskveiða

Björn Valur Gíslaso

Það gerist stundum að fjölmiðlar missa sjónar á umfjöllun sinni um einstök mál þannig að úr verður mál sem hvergi á sér stoð í raunveruleikanum. Fjölmiðlar verða þannig oft leiksoppar áhrifamikilla aðila eða áróðursherferðar sem ná taki á umræðunni og nota fjölmiðlunga til að stýra henni að eigin geðþótta. Eitt slíkt hefur verið áberandi í öllum miðlum undanfarna daga en það er s.k. fyrningarleið sem ríkisstjórnin er sögð vera ákveðin í að fara við stjórn fiskveiða. Því er blákalt haldið fram að ríkisstjórnin hafi ákveðið að hefja fyrningu kvótans með innköllun á honum frá og með 1. september á næsta ári.Samt er hvergi hægt að finna þeirri fullyrðingu stað í samstarfsyfirlýsingu stjórnarflokkanna. Þvert á móti stendur þar skýrum stöfum að allar breytingar sem hugsanlegra verður gripið til við stjórn fiskveiða, verði gerðar í samráði og samstarfi við alla hagsmunaaðila í sjávarútvegi. Það stendur einnig skýrum stöfum í yfirlýsingunni að ríkisstjórnin ætli sér að vinna, í samráði við hagsmunaaðila, áætlunum innköllun og endurúthlutun veiðiheimilda sem eigi að liggja fyrir haustið 2010. Hvergi minnst á það að innköllun veiðiheimilda eigi að hefjast á ákveðnum tíma. Miklu frekar að opnað sé á möguleika til annarra leiða með því að kalla alla hagsmunaaðila í sjávarútvegi að borðinu til rökræðna um þessa mikilvægu atvinnugrein. Í sjávarútvegsstefnu Vinstri grænna er í ítarlegu máli raktar þær leiðir sem flokkurinn telur færar við stjórn fiskveiða en þar segir líka að flokkurinn sé “engu að síður reiðubúinn til að skoða aðrar leiðir til réttlátari skiptingar geti það orðið til að flýta fyrir breytingum í rétta átt og útilokar engar þeirra fyrirfram.” Lykilatriðin í stefnu ríkisstjórnarinnar í sjávarútvegsmálum er samráð og samstarf við aðila í greininni og þannig verður það. Einhvernvegin finnst mér fjölmiðlar hafa látið ráðskast talsvert með sig í þessu máli og þannig misst tökin á aðalatriðunum, þ.e. að lög um stjórn fiskveiða verða endurskoðuð í samráði við hagsmunaðila í greininni og engar fyrirætlanir eru um að hefja innköllun aflaheimilda á næsta ári eins og þó er blákalt haldið fram.
Rétt í þessu fæ ég svo Fréttablaðið í hendurnar þar sem segir að sjómenn muni þurfa að blæða ef takmörk verði sett á útflutning á óunnum fiski! Hvað þá með fólk í landi sem hefur ekki vinnu við að vinna og verka fisk? Er þetta ekki sameiginleg auðlind sem við eigum öll rétt á að njóta góðs af – eða hvað??