Blakað á Dalvík

Héðinsfjarðargöngin hafa breytt miklu hér á Siglufirði nú þegar og í sumar held ég að við sjáum í raun hversu miklu þau breyta fyrir okkur því ég hef trú á að hér verði algjör sprenging í ferðamennskunni. Íþróttalífið fer ekki varhluta af opnun ganganna, hér hafa að undanförnu verið haldin tvö stór íþróttamót þar sem leikið hefur verið í íþróttahúsunum í báðum byggðarkjörnum,Íslandsmót yngri flokka í badminton og öldungamót í blaki, og tókust bæði eins og best verður á kosið. Síðasta miðvikudag renndi hópur siglfirskra blakara inn á Dalvík og lék gegn heimamönnum og þeir munu heimsækja okkur fljótlega. Göngin hafa auðveldað lífið fyrir okkur íþróttafólkið til mikilla muna, fjölgað kostum, lækkað ferðakostnað og gert okkur kleift að rækta betur sambönd við vini okkar í Eyjafirðinum.