Minningarsteinn í Ólafsfirði

Fréttir

Minningarsteinn í Ólafsfirði

Björn Valur Gíslason

Í kirkjugarðinum í Ólafsfirði er fallegur steinn þar sem fólk getur minnst ættingja og vina sem hvíla annarsstaðar en í kirkjugarðinum. Allan ársins hring, nánast á hverjum degi loga kerti við steininn til minningar um þá sem látnir eru. Ég og mín fjölskylda erum ein af ein af þeim fjölmörgu sem höfum notfært okkur þennan möguleika allt frá því steininum var þarna fyrir komið og þannig verið auðveldara fyrir okkur að halda minningu ástvina okkar á lofti. Ef ég man rétt þá var það að frumkvæði félagsskapar um sorg og sorgarviðbrögð í Ólafsfirði sem steinninn var settur í kirkjugarðinn og líklega kom sóknarpresturinn á þeim tíma Sigríður Guðmarsdóttir einnig þar við sögu. Það væri hinsvegar gaman að fá upplýsingar um þetta mál, hvenær steinninn var settur þarna niður, hverjir stóðu að því og fleira ef eitthvað er. Sömuleiðis væri gaman að vita hvort fleiri slíka steina sé að finna í kirkjugörðum landsins. Hér á Akureyri er ekki jafn góð aðstaða og í Ólafsfirði að þessu leiti en það ætti að vera auðvelt að bæta úr því ef vilji er til þess.