Siglfirskar konur gengu saman á mæðradaginn
Sunnudaginn 8. maí á mæðradaginn kom hópur kvenna saman við Torgið á Siglufirði.
Gengu þessar mæður, dætur, ömmur og vinkonur saman til styrktar krabbameinsrannsóknum í brjóstum í blíðskaparveðri.
Kjarnakonan, Erla Gunnlaugsdóttir skipulagði viðburðinn af miklum myndarbrag í samvinnu við átakið Göngum saman á mæðradaginn, sem er árlegur viðburður á landsvísu.
Erla minntist sómakonunnar Ásdísar Kjartansdóttur (1948-2013) sem varð að lúta í lægra haldi fyrir þessu illvíga sjúkdómi og kynnti tilgang göngunnar í ávarpi sínu áður en hópurinn hélt af stað.
Að loknum skemmtilegum göngutúr fór hópurinn á Sigló Hótel og snæddi þar saman gómsæta kjötsúpu yfir léttu spjalli.
Erla Gunnlaugsdóttir að kynna tilgang göngunnar áður en haldið var á stað
Texti: Kristín Sigurjónsdóttir
Myndir: Kristín Sigurjónsdóttir
Athugasemdir