Nóg að gera í bakaríinu

Það hefur verið nóg að gera hjá Jakobi Kárasyni og hans góða fólki í Aðalbakarí.

Bakaríið sá um veisluterturnar fyrir opnunarhátíð Héðinsfjarðarganga sem tókst með miklum ágætum.

Að þeirri törn lokinni tóku við venjubundin störf, þó með stórri undantekningu - Héðinsfjarðargöng eru opin.

Opnun ganganna þýðir aukin viðskipti fyrir þjónustuaðila á Siglufirði og hefur bakaríið ekki farið varhluta af því.

Aðspurður sagðist Jakob merkja aukningu í viðskiptum og töluvert af fólki væri að koma frá Ólafsfirði og Dalvík til þess að versla í Aðalbakarí.

Hróður hinna víðfrægu ástarpunga og hinnar klassísku sírópsköku berst greinilega víða og trekkir að.