Ljósmyndasýningar

Ljósmyndasýningar Ljósmyndasafns Siglufjarðar sem fram fara á hverjum þriðjudagsmorgni klukkan 10:30 í Skálarhlíð á Siglufirði, njóta vaxandi vinsælda hjá þeim sem þangað sækja.

Aðallega er það eldra fólk, bæði það sem býr að Skálarhlíð og þeir sem heima eiga úti í bæ.
Að megninu til er þetta sama fólkið sem kemur aftur og aftur og fjöldi gesta hefur verið á bilinu 18-25 í senn sem koma til að njóta myndanna og til að þekkja andlitin sem koma á skjáinn.
Lauslega áætlað eru nafnaheimtur um 80 % .

Tilgangur þessara sýninga er tvennskonar, það er að stytta þessu fólki stundir og njóta í staðinn þekkingar þeirra á andlitum sem þarna birtast.

Það er ánægjulegt að fylgjast með áhuga fólksins á andlitunum, oft er mikið skrafað og gruflað, „...er þetta ekki sonur hans Jóns hérna sem....“ jú áreiðanlega, hét hann ekki Sævar....“ oft koma nokkrar tilgátur um nöfn, fólk man hvar það átti heima, hvað sonur hans eða dóttir gerði eða giftist osfv. Oftar en ekki hjálpa þau hvort öðru að finna hið rétta nafn.


Ljósmyndasafn Siglufjarðar þakkar öllu þessu ágæta fólki fyrir alla hjálpina, sem og öðrum sem sent hafa okkur upplýsingar beint frá vef safnsins, um nöfn og viðburði sem bera við augu í safninu.

Við hvetjum alla sem áhuga hafa á að heimsækja okkur, í Skálarhlíð á þriðjudagsmorgnum, skrifstofuna við Gránugötu, og eða á netinu.

Meðfylgjandi myndir voru teknar í morgun á meðan ljósmyndasýningin stóð yfir.