Gréta Salóme á Þjóðlagahátíðinni á Siglufirði. Þjóðlagasetrið heldur upp á 10 ára afmæli sitt

Titilmynd hátíðar

Ástarkvæði og ástarsöngvar í sinni fjölbreyttustu mynd munu hljóma á Þjóðlagahátíðinni á Siglufirði dagana 6.-10 júlí. Á hátíðinni verða hátt í 20 tónleikar auk þess sem haldið verður upp á 10 ára afmæli Þjóðlagaseturs sr. Bjarna Þorsteinssonar.

Íslensk tónlist er að vanda í öndvegi á þjóðlagahátíðinni á Siglufirði. Bára Grímsdóttir og Chris Foster syngja íslensk þjóðlög og leika á langspil og Þórunn Pétursdóttir flytur barnagælur og þulur í útsetningum eftir Báru Grímsdóttur. Bára kveður einnig stemmur ásamt Chris Foster sem leikur á langspil og íslenska fiðlu.
Þjóðlagahópur Tónlistarskóla Kópavogs kemur fram og hljómsveitin Nefndin syngur og leikur lög við ljóð eftir Hákon Aðalsteinsson skáld og hagyrðing. Ný verk verða frumflutt eftir Guðrúnu Ingimundardóttur og Gísla J. Grétarsson. Jóhanna Þórhallsdóttir syngur ástarsöngva Megasar ásamt hljómsveit og Ágústa Sigrún Ágústsdóttir syngur lög af diski sínum Stjörnubjart með hljómsveitinni Andakt.

Á hátíðina koma fjölmargir ungir tónlistarmenn frá meginlandi Evrópu, Norðurlöndunum og Bandaríkjunum og flytja gestum tónlist í samvinnu við íslenska tónlistarmenn.
Einnig koma góðir gestir frá Spáni: þau Guðrún Jóhanna Ólafsdóttir og Francisco Javier Jáuregui flytja tónlist frá Spáni og Baskahéruðum Spánar. Arnaldur Arnarson gítarleikari sem búsettur er í Barselóna gleður hátíðargesti með fjölbreyttri gítartónlist og heldur gítarnámskeið.
Norski fiðlusnillingurinn Ragnar Heyerdahl leikur sína eigin tónlist í þjóðlegum stíl sem hann nefnir Ísaslátt og á lokatónleikum hátíðarinnar flytur Sinfóníuhljómsveit unga fólksins 1. sinfóníu Mahlers auk Íslenskrar svítu eftir Misti Þorkelsdóttur undir stjórn Gunnsteins Ólafssonar.

Boðið er upp á fjölbreytt námskeið á þjóðlagahátíðinni að vanda. Auk gítarnámskeiðs Arnaldar Arnarsonar kennir listina að yrkja vísur, Örlygur Kristfinnsson gengur um Siglufjörð og fræðir gesti um staðinn, Gunnsteinn Ólafsson verður með kórstjórnarnámskeið og Björg Þórsdóttir verður með skapandi námskeið fyrir börnin.

Stórsöngvararnir Davíð Ólafsson og Stefán Íslandi halda upp á 20 ára söngafmæli sitt með stofutónleikum heima hjá bæjarbúum og á sjúkrastofnunum ásamt Helga Hannesar píanóleikara. Síðast en ekki síst heldur Greta Salóme tónleika ásamt hljómsveit laugardaginn 9. júlí og býður upp á allt það besta sem hún hefur verið að semja og vinna að heima og erlendis.
Listrænn stjórnandi Þjóðlagahátíðarinnar er Gunnsteinn Ólafsson. Sjá nánar heimasíðu hátíðarinnar www.folkmusik.is. Miðasala er á midi.is.

Dagskrá hátíðarinnar má nálgast hér http://www.folkmusik.is/is/page/thjodlagahatid-2016