Kaffi Rauðka - Tónleikar - Stebbi og Eyfi

Stebba og Eyfa þarf vart að kynna fyrir landanum en þeir halda til Siglufjarðar fimmtudaginn 10. maí þar sem þeir munu troða upp á Kaffi Rauðku.

Þeir félagar eru meðal þeirra tónlistamanna sem verið hafa einna mest áberandi í íslensku tónlistalífi allt frá því á síðustu öld og hafa túrað reglulega saman frá því árið 2007. Hver man ekki eftir því þegar þeir slógu í gegn saman með laginu um Nínu í Eurovision.





Stebbi og Eyfi hafa spilað og sungið saman allt frá árinu 1988 og hefur lifandi flutningur verið þeirra aðalsmerki.

Eyjólfur Kristjánsson hefur verið atvinnutónlistarmaður síðan 1982. Eftir Eyjólf liggur býsnin öll af lögum og textum, sem hljómað hafa á öldum ljósvakans í yfir 25 ár. Eyjólfur hefur gefið út 6 sólóplötur á ferlinum, og nú í ágúst s.l. kom út geisladiskurinn “Sýnir”, sem inniheldur lög Bergþóru Árnadóttur í útsetningum Eyjólfs. Eyjólfur hefur einnig sent frá sér lög og hljómplötur með hljómsveitum sínum “Hálft í hvoru” og “Bítlavinafélaginu”. Meðal þekktari laga Eyjólfs eru t.d. “Ég lifi í draumi”, “Álfheiður Björk”, “Danska lagið”, “Dagar” og “Draumur um Nínu”, en það lag flytja þeir saman Eyjólfur og Stefán Hilmarsson og hefur það lengi verið eitt allra vinsælasta dægurlag á Íslandi.

Stefán Hilmarsson kom fyrst fram á sjónarsvið tónlistarbransans árið 1987 með hljómsveit sinni “Sniglabandinu”. Árið 1988 var  “Sálin hans Jóns míns” stofnuð og hljómsveitin hefur spilað með hléum síðan þá, gefið út fjöldann allan af hljómplötum og gerir enn. Stefán er einn allra fremsti textasmiður dægurtónlistarinnar og eftir hann liggja fjölmargir textar á hljómplötum bæði í eigin flutningi og annarra. Meðal þekktustu texta Stefáns eru t.d. “Hvar er draumurinn”, “Líf”, “Undir þínum áhrifum”, “Þú fullkomnar mig” o.m.fl. Stefán hefur einnig gefið út 3 sólóplötur og árið 2006 kom út platan “Nokkrar notalegar ábreiður”, sem var samstarfsverkefni þeirra Stefáns og Eyjólfs Kristjánssonar.