Magnaðir tónlistamenn á ferð og Siglfirðingur þeirra á meðal
Hljómsveitin Nykur leggur leið sína á Siglufjörð næstkomandi laugardag en þeirra á meðal er Siglfirðingurinn Jón Svanur Sveinsson sem spilar á bassa. Hljómsveitin hefur nú gefið út sína aðra plötu, Nykur II en fyrri platan hlaut mikið lof enda kraftmikið og skemmtilegt rokk þar á ferð.
Nykur er rokksveit, mönnuð reynsluboltum úr bransanum. Hljómsveitin spilar kraftmikið sígilt rokk, frumsamin lög með grimmum gítarriffum, ofin saman við ágengar laglínur sem innihalda bitastæða texta á okkar ylhýra.
Nykur varð til sumarið 2013 og gaf fljótt út sýna fyrstu plötu það ár, samnefnda sveitinni. Frumraunin fékk prýðis viðtökur og var líka gerður góður rómur af tónleikum hennar í kjölfarið. Nykur er í þessum skrifuðum orðum að ljúka gerð annarrar plötu sinnar, sem er búin að vera í vinnslu síðustu misseri. Gripurinn er væntanlegur í mars og kitlar bandið í fingurnar að fara að spila aftur á tónleikum um land allt.
Hljómsveitina skipa; Davíð Þór Hlinason (Dos Pilas) söngur og gítar, Guðmundur Jónsson (Sálin hans Jóns míns) gítar og bakraddir, Kristján B. Heiðarsson (Dark Harvest) trommur og bakraddir og Jón Svanur Sveinsson (Númer Núll) á bassa og bakraddir.
Forsalan hófs á Sigló Hótel miðvikudaginn 30.mars, miðaverð 2.000kr.
Athugasemdir