Ósjálfrátt seyti adrenalíns í hámarki

Ómar Guðjónsson, Ingi Björn Ingason, Helgi Sv. Helgason, Matthías MD Hemstock héldu magnaða tónleika á Hannes Boy Café í gærkvöldi.

Ómar er á ferð um landið ásamt hljómsveit til þess að fylgja eftir sinni þriðju sólóplötu, Von í óvon.

Síðustu tvær plötur hans hafa fengið Íslensku tónlistarverðlaunin og áttu tónleikagestir því von á góðu.



Fjöldi fólks mætti á tónleikana og gleymdi stað og stund í tvær klukustundir.

Það er greinilega mikil eftirspurn eftir svona gæðatónleikum og mættu fjölmargir tónleikaþyrstir íbúar á svæðið og urðu ekki fyrir vonbrigðum.

Tónleikagestir fengu heldur betur góða áfyllingu á tónlistartankinn enda á ferðinni miklir listamenn sem kunna að miðla listsköpun sinni á einstakan hátt í gegnum hljóðfæri sín.

Ómar og félagar byrjuðu tónleikana af miklum krafti og héldu áheyrendum hugföngnum alla tónleikana. Hljómsveitin var greinilega í góðum gír og lék af mikilli færni, innlifun og nutu þess greinilega flytja tónlistina.



Ómar Guðjónsson, gítarleikari, var í góðum gír og heillaði alla með sér.

Þeir félagar Helgi Svavar Helgason og Matthías MD Hemstock spiluðu báðir á trommur og náðu einstaklega djúpum og flottum „rythma“ sem fékk hárin á fólki til þess að rísa.



Helgi Svavar, tommuleikari, lamdi húðirnar af miklum krafti og innlifun.



Matthías MD Hemstock, trommuleikari, var fagmennskan holdi klædd og náðu hann og Helgi einstaklega vel saman í trommuleiknum.



Ingi Björn Ingason, bassaleikari, sýndi góð tilþrif og var gríðarlega þéttur.

Keyrslan var þvílík og ótrúleg spilamennska hljómsveitarinnar stuðlaði að ógleymanlegu kvöldi.

Undirritaður fékk margoft gæsahúð þegar þeir félagar flugu sem hæst í spilamennskunni - sennilega hafa margir tónleikagestir svipaða sögu að segja.

Samkvæmt vísindavefnum stafar þetta af ósjálfráðu seyti adrenalíns úr nýrnahettumerg sem fer stundum af stað við tilfinningalega upplifun.

Þessir tónleikar voru svo sannarlega mikil upplifun - meira af þessu takk fyrir !



Ómar fór hamförum í gítarleiknum.