Pæjumót TM 2009 lokið

Pæjumót TM 2009 er lokið. Þetta var 19. Pæjumót sem haldið hefur verið á Siglufirði. Þeir rúmlega 3000 gestir sem voru á mótinu streyma úr bænum og óskum við þeim góðrar heimferðar. Mótið í heild sinni tókst rosalega vel. S.l. þrjá daga hefur veðrið verið stórkostlegt, hiti, logn og skýjað, fótboltaveður sem fótboltaskvísur vilja hafa.
Sólin braust fram á hárréttum tíma í dag til að skína á alla verðlaunapeninga og bikara hjá keppendum. Stúlkurnar sem tóku þátt voru frábærar, hegðunin til fyrirmyndar og þær fengu að spila mikið og skemmta sér þar á milli. Þær voru ánægðar og það er markmið mótsins að stúlkurnar fari héðan með góðar minningar. Tryggingarmiðstöðin fær sérstakar þakkir fyrir að styrkja mótið rausnarlega sem og Samkaup, Vífilfell, SPS, Rammi svo einhverjir séu nefndir. Það væri allt of langt mál að telja upp alla þá sem styrkja mótið á einn eða annan hátt. Ég vil þakka öllu því frábæra fólki sem lagði hönd á plóginn og gerðu helgina svona eftirminnilega. Takk kærlega. Á næsta ári á Pæjumótið 20 ára afmæli og stefnt er að því að gera tuttugasta mótið að því glæsilegasta hingað til, göngin verða vonandi tilbúinn fyrir þann tíma og þá opnast miklir möguleikar. Ég fer sáttur að sofa í kvöld með bros á vör og hlakka til að takast á við tímamóta mót á næsta ári og bíð ykkur öll velkominn á tuttugasta Pæjumót á Siglufirði.

Með fótboltakveðju.

Róbert Haraldsson Formaður KS.

Myndir HÉR