Rauðka og Co kaupa Egilssíld

Sigríður María Róbertsdóttir framkvæmdastjóri Selvíkur ehf., systurfélags Rauðku ehf., og Sigríður Eddý Jóhannesdóttir fyrir hönd Egilssíldar ehf. skrifuðu í dag undir kaupsamning þar sem Selvík kaupir öll tæki og fasteign Egilssíldar. Þá hefur Selvík einnig forkaupsrétt á rekstri fyrirtækisins næstu átta mánuði.




Egilssíld sem stofnað var árið 1940 hefur í áratugi verið í eigu sömu fjölskyldunnar og hefur fyrirtækið í gegnum tíðina unnið til margra verðlauna fyrir afurðir sínar. Fyrirtækið hefur sérhæft sig í vinnslu á reyktum og gröfnum laxi og reyktri síld fyrir innanlandsmarkað.

Kaup Selvíkur á eignum Egilssíldar er einn liður Rauðku í að laga umhverfið að ferðamannastefnu fyrirtækisins en eins og fólki er nú kunnugt hefur Rauðka lagt mikinn metnað í uppbyggingu á svæðinu við smábátahöfnina á Siglufirði.