Sigurjón á Special Olympics

Siglfirðingar geta nú státað sig af því að eiga ólimpíufara en síðastliðinn föstudag var Sigurjón Sigtryggsson valinn í hóp þeirra sem sækja Special Olympics fyrir Íslands hönd í Aþenu í Grikklandi 25.júní – 4.júlí 2011. Var þetta opinberað á mánudag.





Sigurjón mun keppa í frjálsum íþróttum en þar hefur hann sýnt frábæran árangur í gegnum tíðina. Árangur hans er Siglfirðingum heldur ekki ókunnur en hann hefur verið mjög áberandi í íþróttalífinu á Siglufirði. Meðal árangurs Sigurjóns má telja eftirfarandi:

- Silfurverðlaun í 60 metra hlaupi karla á Íslandsmóti ÍF árið 2010.
- Gullverðlaun í 200m hlaupi karla á Íslandsmóti ÍF árið 2010.
- Besti íþróttamaður Snerpu á aldrinum 13-16 ára í Boccia og Frjálsum Íþróttum árið 2009.
- Silfurverðlaun í kúluvarpi og 100m hlaupi á Norræna barna- og unglingamótinu í Eskilstuna árið 2009.
- Gullverðlaun í 400m hlaupi á Norræna barna- og unglingamótinu í Eskilstuna árið 2009.
- Þrefaldur Íslandsmeistari árið 2008 í 200m hlaupi, 400m hlaupi og kúluvarpi.

Að auki hefur Sigurjón sett ýmis met á ferli sínum og á meðal annars aldursflokksmet í spjótkasti, met hjá UMSS í 300m hlaupi, met í flokki 13-14 ára í 600m hlaupi.

Sigló.is óskar Sigurjóni og Siglfirðingum öllum til hamingju með glæstan árangur hans.