Skólabíll rann út af veginum
Engan sakaði þegar skólabíll með grunnskólabörn úr 4.-6. bekk á leið frá Siglufirði til Ólafsfjarðar rann út af veginum fyrr í dag. Samkvæmt upplýsingum frá lögreglu var börnunum þó nokkuð brugðið. Mikil hálka var á þessum slóðum og þrátt fyrir að vegurinn hafi verið sandaður dugði það ekki til.
Lögregla segir að mikill vindur hafi verið á svæðinu og sandurinn sem borinn var á veginn hafi því hreinlega fokið burtu. Vegurinn var mjög háll og þegar sterkur vindstrengur kom á rútuna rann hún hreinlega út af veginum og fór nokkuð langt út fyrir veg. Rútan valt hins vegar ekki og enginn slasaðist.
Brugðið var á það ráð að salta veginn sem dugði til þess að komast fyrir hálkuna. Rútan var í kjölfarið dregin upp á veg að nýju og hélt áfram áleiðis til Ólafsfjarðar.
Athugasemdir