Sögurnar á Síldarminjasafninu

Að koma við á Síldarminjasafninu er hin albezta skemmtun. Þegar ég kom þar við fyrir stuttu síðan voru hrókasamræður í gangi og miklar pælingar og gullkornin flugu bókstaflega veggja á milli.

 

Páll Helgason reytti af sér gullkornin og Örlygur tók undir og ýtti stöku sinnum við Páli með hin ýmsu málefni sem Örlygi fannst þurfa að kryfja betur.

 

Það er nú bara einu sinni þannig að þessir tveir, þeir Örlygur og Páll hafa sérstakt lag á því að fá hvorn annan til að tala og segja sögur og þá oftar en ekki af hvor öðrum. Og líklega er alltaf bætt vel í þegar sögurnar eru sagðar sem gerir þetta ennþá skemmtilegra.

 

Þórir hjá Herring Gesthouse var þarna líka ásamt Jóni Andrjesi. Þórir kom með nýbakað kryddbrauð sem var alveg sérdeilis gott með miklu smjöri. Ekki það að brauðið hafi verið slæmt án smjörsins en viðbitið gerði þetta bara ennþá betra.

 

Þær stöllur Aníta Elefsen og Steinunn María Sveinsdóttir sátu þarna dolfallnar og hlustuðu af athygli á þessa visku og andans menn sem sátu þarna við borðið og ræddu allt á milli himins og jarðar enda eru þær báðar sagnfræðingar að mennt og líklega voru þær að safna í Sagnfræðiminningabankann fyrir komandi kynslóðir á Sigló. Ég sé fyrirsögnina á bók þeirra Anítu og Steinunnar um þá Pál og Örlyg fyrir mér nokkurn vegin svona "Lygasögur þeirra Örlygs og Páls af hvor öðrum, óleiðréttar". 

 

Slökkviliðstjórinn hann Ámundi Gunnarsson og Þórarinn Hannesson hjá Ljóðasetrinu voru þarna líka og þessir kappar skemmdu nú alls ekki fyrir því að gera kaffistundina á Síldarminjasafninu sem ánægjulegasta.

 

Sögurnar og skemmtilegheitin sem þarna flugu af vörum allra þessara sem ég hef talið upp voru vægast sagt skemmtilegar og það var ekki laust við það að maður hafi verið með hláturmagaverk þegar ég fór út.

 

Páll Helgason bað sérstaklega um það að ég mundi taka mynd af Jóni Andrjesi þar sem hann stendur fyrir neðan forláta ljósakrónu, því þetta sjónarhorn minnti Pál svo ógurlega mikið á hreindýr. Að sjálfsögðu varð ég við þeirri beiðni og myndin af Jóni er hér fyrir neðan.

 

Svo minnum við að sjálfsögðu á nýlega uppfærðu heimasíðuna hjá Síldarminjasafninu sem hefur öll verið endurnýjuð og er hin glæsilegasta hér : www.sild.is

 

Steinunn María, Páll Helgason og Anita Elefsen að ræða málin.

 

Örlygur Kristfinnsson.

 

Þórir og Þórarinn hlusta af athygli. Líklega eru þeir að hlusta á gullkorn frá Páli.

 

Steinunn María.

 

Anita Elefsen.

 

Ámundi Gunnarsson.

 

Jón Andrjes, kryddbrauðið góða og smjörið.

 

Hér eru þau Steinunn, Páll, Örlygur og Anita að skoða gamalt landakort sem Jón Andrjes kom með.

 

Að lokum er svo ein mynd af Jóni Andrjesi sem ég tók sérstaklega fyrir Pál.