Tjaldaði á milli snjóskafla
Fimmtudaginn 24. mars sá undirrituð ungan mann tjalda á milli snjóskafla á tjaldstæði Siglufjarðar í miðbænum.
Vakti þetta forvitni mína enda veðrið ekkert til að hrópa húrra yfir og veðurspáin fyrir næstu daga ekki beint vænleg fyrir útilegu. Ungi maðurinn var hinn hressasti og sagðist heita Jaroslav Precuch og vera frá Slóvakíu.
Erindi hans norður var að skoða landið og hafði ferðin gengið vel. Hann er búsettur í Reykjavík og vildi nota páskafríið til að ferðast og væri alveg sama um veðrið og færi vel um hann í tjaldinu.
Jaroslav ætlaði síðan að halda för sinni áfram og væri markmiðið hjá honum að komast á Blönduós á Föstudaginn langa og skoða sig um þar.
Við óskum þessum bjartsýna ferðalang gleðilegra páska og góðrar ferðar.
Texti: Kristín Sigurjónsdóttir
Mynd: Kristín Sigurjónsdóttir
Athugasemdir