Trío Björns Thoroddsen og Andrea Gylfadóttir

Björn Thoroddsen leiddi sitt margrómaða tríó ásamt Andreu Gylfadóttur söngkonu á frábærum tónleikum í Bátahúsinu. Saman fluttu þau mörg af fallegustu sönglögum síðustu aldar við góðar undirtektir viðstaddra.

Góð mæting var á tónleikana í gær og hátt í 250 manns komu sér fyrir í Bátahúsinu og áttu góða kvöldstund.
 
Lögin sem Tríóið og Andrea fluttu í gær hafa fylgt íslensku þjóðinni í áratugi, yfirfull af vor-, sumar- og sveitarómantík og hafa fyrir löngu fest sig í sessi hér á landi, hvort sem þau eru íslensk eða ekki.

Heyra mátti lög eins og Fram í heiðanna ró, Vorvindar glaðir, Út um græna grundu, Blátt lítið blóm eitt og fleiri klassískar perlur sem heilluðu tónleikagesti.

Þegar svona einvalalið tónlistarmanna kemur saman er varla hægt að klikka og var útkoman gríðarlega flott.

Tríóið var í góðum gír og léku fagmannlega og af mikilli innlifun og Andrea heillaði viðstadda jafnt með söng sínum og skemmtilegri framkomu.

Uppskáru þau mikið lófaklapp í lok hvers lags og uppklapp í lok tónleikanna. Frábær byrjun á þjóðlagahátíð og setur tóninn fyrir framhaldið.